नयाँ युके डेभलपमेन्ट पोर्टफोलियो अन्तर्गत बेलायतले नेपाललाई ५०५ मिलियन डलर अनुदान दिने भएको छ ।
बेलायतका अन्तर्राष्ट्रिय विकासमन्त्री एन्ड्र्यु मिसेलको दुई दिने नेपाल भ्रमणका क्रममा उक्त पोर्टफोलियोको उद्घाटन गरिएको हो । सन् २०३० सम्म नेपालले प्राप्त गरिसक्ने गरि उक्त अनुदान सहयोग बेलायतले दिन लागेको हो । अनुदानले जलवायु संकटसँग जुध्न तथा विकासका लागि अन्तर्राष्ट्रिय वित्त परिचालन, आर्थिक रूपान्तरण, सुशासन र समावेशीकरणमा मद्दत पुर्याउने जनाइएको छ ।
नेपाल भ्रमणका क्रममा विकासमन्त्री मिसेलले प्रधानमन्त्री पुष्पकमल दाहाल, परराष्ट्रमन्त्री एनपी साउद र अर्थमन्त्री डा. प्रकाशशरण महतसँग भेटवार्ता गरेका थिए । उनले ब्रिटिस इन्टरनेसनल इन्भेस्टमेन्टले २२ मिलियन वित्तीय सहायता दिएको माथिल्लो त्रिशुली-१ जलविद्युत आयोजनाको पनि भ्रमण गरेका थिए ।
